Venjarin: Brikkarnir skulu leggjast á rætt pláss

Tveir av teimum, sum hava verið fastir fúsir á landsliðnum hjá Eyðuni Klakstein, í hesi metundankappingini, eru miðvallarin Brandur H. Olsen og vongverjin í høgru Jóannes Kalsø Danielsen.

NSÍ-maðurin er skaddur, meðan KÍ-maðurin hevur leikbann. Tískil skal venjarin Eyðun Klakstein leggja onkrar brikkar av nýggjum til avgerandi HM-undankappingardystin ímóti Kroatia í Rijeka í annaðkvøld.

LES EISINI: Vit gita: Hetta verður liðið

 - Vit sakna teir eitt sindur, sjálvandi gera vit tað, men tíbetur hava vit fleiri møguleikar at manna liðið. Í hesum føri hava vit so tveir ella tríggjar, sum kunnu spæla ein góðan høgra bakk, og vit hava so valt ein, sum vit halda riggar best til hendan dystin, sigur Eyðun Klakstein, sum kortini ikki vil seta navn á fyrrenn dysturin nærkast í morgin.

 - Inni á miðjuni eru vit so eitt sindur skerdir av, at tá Brandur Olsen ikki er við, er Hallur Hansson heldur ikki við, og Noah Mneney var noyddur at geva avboð, so har ruku kanska tríggir sentralir miðvallarar í senn. Men eg haldi, at vit hava funnið eina góða loysn. 

Annars lat venjarin væl at møguleikunum á fleiri øðrum plássum. Viljormur Davidsen og Martin Agnarsson eru í harðari kapping um plássið á vinstra vongbakki, meðan fleiri kunnu byrja á fremsta plássi.

SÍ EISINI: Skulu læsa kroatar inni

Dysturin ímóti Kroatia byrjar klokkan 19.45 fríggjakvøldið, og Kringvarpið byrjar at senda eftir Dag og Viku.