Forkvinnan: Roynt verður at drála fosturtøkumálið í rættarnevndini

- Tað er ikki vanlig mannagongd at bera seg soleiðis at.

Tað sigur Hervør Pálsdóttir, forkvinna í rættarnevndini, nú størri minnilutin í rættarnevndini ikki skrivar undir álit í málinum um nýggja fosturtøkulóg. Longda freistin at skriva álit fór fríggjadagin 7 november. 

 - Eg havi roynt at latið ivan koma teimum til góðar, men nú er eingin ivi longur um, at tey royna at drála, sigur Hervør Pálsdóttir.

Hon dugir ikki at siga, nær álitið verður lagt fram:

Henrik Old úr Javnaðarflokkinum læt hósdagin umsitingini í løgtinginum sítt álit í málinum um fosturtøkulóg. Hann er einsamallur ein minniluti í rættarnevndini í málinum.

Ein annar minniluti í nevndini - Helgi Abrahamsen úr Sambandsflokkinum, Elsebeth Mercedis Gunnleygsdóttir úr Fólkaflokkinum, og Rósa Tyril Gaardlykke úr Miðflokkinum - hevur frammanundan latið umsitingini álit sítt.

Helgi Abrahamsen, sum er næstformaður í rættarnevndini, segði hósdagin, at tey lótu umsitinigni sítt álít mikukvøldið. 

Upprunaliga freistin, sum var 30. oktobur, varð longd til 7. novembur, og tann freistin fór altso fyri 10 døgum síðani.