Gamlir trupulleikar spøktu undan HM-fráferð

Gamlir trupulleikar spøktu, tá Føroyar taptu 27-24 fyri Íslandi í HM-upphitingardysti við Tjarnir leygarkvøldið.

Føroysku kvinnurnar, sum annars vunnu á Íslandi í EM-undankappingini fyri kortum, misnýttu ov nógvar málkjansir, og tað var høvuðsorsøkin til tapið ímóti íslendingum, sum leggja fyri í HM-endaspælinum við dysti ímóti týsku vertunum.

Føroyska spælið annars var heldur misjavnt bæði í verju og álopi, men tað var kanska orsakað av nógvu skiftingunum, sum venjarin Claus Mogensen gjørdi ígjøgnum dystin.

Júst tað sást eisini aftur á máltalvuni. 10 spælarar komu á máltalvuna; Lív S. Poulsen, Pernille Brandenborg og Jana Mittún vóru føroyskir toppskjúttar við fýra málum í part. Síðstnevnda legði upp til ikki minni enn níggju og sementeraði enn einaferð sín lyklastatus í álopinum.

Anna Elisabeth H. Weyhe og Karin Egholm, sum hava drigist við skaðar, sóu báðar út til at vera HM-klárar, og Annika Fríðheim Petersen fekk fitt av spælitíð, nú hon er aftur eftir barnsburð. Tó verður tað helst Rakul Wardum, sum fær málmansplássið frá byrjan í Trier.

Tað verður Ísland, sum fer til HM við sigurskensluni í búkinum, meðan føroyingarnir skulu lyfta avrikið eitt ella tvey stig til fyrsta dystin ímóti Montenegro mikukvøldið. Tær vóru tungar at dansa við í undankappingardysti fyri kortum. Tær vera neyvan lættari í Trier.