Marianna Eystberg: Fyrstu ferð til endaspæl

Marianna Geirsdóttir Eystberg var í nógv ár fastur partur av føroyska hondbóltslandsliðnum, men vegna barnsburð og skaðar spældi hon ikki við fullari ferð í eina tíð. Tí spældi hon heldur ikki fyri Føroyar í trý ár.

Nú er fyrrverandi kyndilsbakkurin, sum í løtuni umboðar BK Ydun í næstbestu donsku deildini, við aftur, og hon fær tískil sítt fyrsta endaspæl.

 - Tað er ordiliga deiligt at vera aftur. Her eru fleiri av teimum somu gentunum, sum vóru tá, og tað er altíð stuttligt at vera á landsliðnum, so tað eri eg ordiliga glað fyri, sigur Marianna Geirsdóttir Eystberg.

Nakrar í føroyska hópinum eru við til eitt endaspæl fyri fyrstu ferð, men mentala arbeiðið hevur stóran týdning fyri allan hópin, og í tí hópinum hevur Jens á Skipagøtu stóran leiklut.

 - Hann minnir okkum á, at vit skulu hugsa um okkara leiklut, hugsa um støður í dystinum, og so hava vit altíð okkara virðir við, greiðir Marianna Geirsdóttir Eystberg frá.

 - Tað er millum annað ábyrgd, samstarv og hugburður. Tað fokusera vit nógv upp á at hava við, sigur bakkurin, sum síðstu árini hevur fylgt landsliðnum av síðulinjuni.

 - Tað er hent nógv upp á hesi trý árini, eg havi verið vekk. Seinasta landsdyst eg spældi var ein HM-kvalifikatiónsdystur, so vit hava ikki verið í nærheitini av endaspølum, sigur Marianna Geirsdóttir Eystberg.

Hon og hinar á landsliðnum skulu í eldin í annaðkvøld klokkan 19.30. Kringvarpið byrjar at senda frá dystinum klokkan 18.50.