Vár silvur í Versa Challenge

Vár G. Hansen róði seg til silvurheiðursmerki í Versa Challenge, sum er stór kapping í maskinrógving, sum hevur verið í Singapore um vikuskiftið. 

Harumframt eydnaðist henni at seta heimsmet í greinini, sum snúi seg um at rógva so nógvar metrar sum gjørligt upp á ein minutt.

Hatrikk í fyrstu avbjóðingunum

Kappingin roynir íðkararnar í styrki, ferð og úthaldni í fimm ymsum greinum, og heimsmetið kom longu í fyrstu greinini, tá Vár G. Hansen róði 366 metrar upp á 60 sekund. 

Vár G. Hansen vann eisini aðru avbjóðingina, sum snúi seg um at vera fyrstur at rógva 10 metrar framum kappingarneytan; eitt slag av togtogan.

Sterki føroyingurin fekk hattrikk, tá hon eisini vann triðju avbjóðingina, sum var ein taktiskur róður í seks minuttir við fleiri ferð- og temposkiftum.

Millum tey sterkastu

Í fjórðu avbjóðingini gekk ikki eftir vild, og Vár G. Hansen endaði nummar fimm. Í fimtu og seinastu avbjóðingini, sum var ein langur úthaldnisróður, har aftasti íðkarin varð tikin úr kappingini fyri hvørjar tveir minuttir, endaði føroyingurin á triðja plássi.

Hetta rakk til silvurpláss samanlagt, sum prógvar, at Vár G. Hansen telist millum sterkastu maskinrógvarar í heiminum.