Súna: - Hetta er ikki seinastu ferð vit eru til HM

Súna Krossteig Hansen var avgjørd, tá hon var spurd, um avrikið hjá Føroyum undir HM-endaspælinum, gevur henni og liðfeløgunum blóð upp á tonnina.

 - Ja! Hetta er ikki seinastu ferð, vit eru til HM, segði bakspælarin, sum hevur víst seg fram við fleiri góðum avrikum í teimum seks dystunum, sum Føroyar hevur spælt í Trier og Dortmund.

Í ósigrinum fyri Íslandi leygardagin, skoraði hon seks ferðir upp á seks royndir og vann eisini Føroyum brotskøst. Tað rakk tíverri ikki til sigur, sum hevði sent Føroyar upp á triðja pláss í bólkinum og eitt samanlagt pláss ímillum níggju og 12 í heimsmeistarakappingini.

 - Eg eri ræðuliga skuffað. Tað er ræðuliga kensuborið, at vit seta hetta sum seinasta punktum, men eg eri øgiliga errin av tí, vit hava víst fram á hondbóltsvøllinum síðstu vikurnar, segði Súna Krossteig Hansen.

Ísland hevði yvirvág allan dystin, og hóast Føroyar nærkaðust nógv í tveimum førum, eydnaðist ikki at koma upp á javnt. Ísland vann 33-30, og fekk síni fyrstu stig í miðumfarinum.