Kamaradvokaturin verður tikin av

Advokatvirkið Poul Schmith verður frá 2028 ikki longur kamaradvokatur í Danmark, tað vil siga advokatur hjá statinum.

Danska stjórnin hevur gjørt av stutt og greitt at strika kamaradvokatin.  

Poul Schmidt hevur verið kamaradvokatur siðani 1936.

Virkið hevur einarætt til at veita statinum sakførarahjálp.

Kamaradvokaturin virkar eisini fyri landsstýrini í Føroyum og Grønlandi.

Í 2024 sendi Kamaradvokaturin rokning til danska statin, sum var 650 milliónir krónur, skrivar TV2.

Tænastur bjóðast út

Ein statsadvokatur kemur í staðin fyri kamaradvokatin.

Og advokattænastur fyri 200 milliónir krónur skulu bjóðast út, skrivar TV2.

Poul Schmith hevur gjørt rammuavtalu við grønlendska landsstýrið, og virkið letur upp skrivstovu í Nuuk.

Poul Schmith hevur í nógv ár hjálpt landsstýrinum. 

Í Grønlandi fer Poul Schmith fyrst og fremst at arbeiða fyri stovnarnar hjá landsstýrinum, grunnar og feløg.

Men advokatvirkið kann eisini átaka sær uppgávur fyri kommunurnar og danska statin.