Kalsoyingar: Undirsjóvartunnil besta loysnin at menna oynna

Í vikuni var skipað fyri oyggjafundi í Mikladali um samferðsluviðurskiftini í Kalsoynni í framtíðini

Í longdini fer tað at loysa seg betur at gera undirsjóvartunnil í Kalsoynna, enn at byggja nýggja ferju og broyta ferjuleguna á Syðradali, halda kalsoyingar. (Savnsmynd)

Elin S. Winther Poulsen

Jón Brian Hvidtfeldt

19.02.2026 - 10:56

Undirsjóvartunnil í Kalsoynna er frægasta loysnin, tá hugsað verður um at menna Kalsoynna í framtíðini.

Tað var niðurstøðan á oyggjafundi í Mikladali í týskvøldið um framtíðar samferðslu í Kalsoynna.

Nú er ætlanin at greina málið nærri á stórfundi á Skúlatrøð í Klaksvík, har politikarar og tunnilsserfrøðingar vera við, sigur Sólarn Isaksen á Húsum, sum er millum teirra, ið skipa fyri.

Sólarn Isaksen sigur, at á oyggjafundinum var ført fram, at hóast íløgan í fyrsta umfari er størri, er undirsjóvartunnil í longdini bíligara loysnin fyri landskassan:

Hoyr innslag í útvarpstíðindunum:

19022026_Solarn_Isaksen

Strandfaraskipið Sam

Nýggj ferja fyri Sam fer at kosta 180 milliónir kr., og undirsjóvartunnil fer at kosta millum 800 milliónir og 1,1 milliard, segði Ruth Vang, landsstýriskvinna, í tinginum í gjár. (Mynd Strandferðslan)

Nýggj ferja kostar 180 milliónir

Nýggj ferja til kalsoyarleiðina fer væntandi at kosta umleið 180 milliónir krónur. Og haraftrat skulu brúkast tíggjutals milliónir krónur til at bøta um ferjuleguna á Syðradali.

Tað upplýsti Ruth Vang, landsstýriskvinna í samferðslumálum, tá munnligir fyrispurningar vóru á skránni í løgtinginum í gjár.

Hon upplýsti eisini, at ein undirsjóvartunnil til Kalsoynna væntandi fer at kosta millum 800 milliónir og 1,1 milliard krónur.

Hoyr innslag í útvarpstíðindunum:

19022026_Fyrisp__um_kalsoyarleid