Netálop á grønlendskar heimasíður

Fleiri grønlendskar heimasíður er í løtuni stongdar, orsakað av netálopi.

Tað váttar danska stýrið fyri samfelagstrygd.

Talan er um sonevnd DDoS-álop á heimasíðurnar, sum merkir, at tey, ið fremja álopið, leggja trýst á heimasíður, soleiðis at tær ikki rigga.

Enn er ógreitt, hvørjar grønlendskar heimasíður talan er um.

Sambært grønlendska miðlinum, Sermitsiaq, ber til at fara á tær flestu umráðandi heimasíðurnar.

Sambært danska kringvarpinum er talan um pro-russiskar teldusníkar, sum í november í fjør framdu netálop á heimasíður hjá nøkrum donskum kommum og stjórnardeildum.

Bólkurin við russisku teldusníkunum hevur verið virkin síðani mars í 2022, og hevur javnan framt netálop á myndugleikar og fyritøkur í NATO-londunum og øðrum evropeiskum londum, sum verða mett at vera ímóti russiskum áhugamálum, skrivar Sermitsiaq.