Steinbjørn Hardlei givin sum verkætlanarleiðari

Steinbjørn Hardlei er givin sum verkætlanarleiðari á Barnaverkætlanini. 

Tað váttar Barna- og útbúgvingarmálaráðið.

Tað er hent eftir ynski hjá Steinbjørn Hardlei sjálvum, og talan er sostatt ikki um ósemju ella misrøkt av starvinum. 

Steinbjørn Hardlei stillar upp til løgtingsvalið fyri Tjóðveldi, men leiðsluskiftið hevur heldur onki við løgtingsvalið at gera.

Steinbjørn Hardlei, sum hevur starvast sum verkætlanarleiðari á Barnaverkætlanini síðani í mai 2024, heldur fram sum ráðgevi á verkætlanini, við tilvísing til verkætlanarleiðaran. Tað ger hann eftir valið.

Synnøve av Rana

Synnøve av Rana nýggjur leiðari

Synnøve av Rana tók við leiðsluni av Barnaverkætlanini 1. mars. Hon hevur verið samskipari av Barnaverkætlanini síðani januar 2024. Fyrst sum fyribilssett og síðani í tíðaravmarkaðari setan frá juni 2024, til endan av hesum árinum. 

Høvuðsendamálið við Barnaverkætlanini er at laga niður forðingar, sum kunnu vera millum ymiskar skipanir, tá tørvur er á at tryggja sameindar og samskipaðar tænastur. 

Barnalógin er eisini partur av Barnaverkætlanini. Hon er liðug, og var á veg í løgtingið, tá val varð útskrivað. Eitt nýtt landsstýri tekur støðu til Barnalógina.  

Eftir ætlan heldur Barnaverkætlanin fram hetta árið. Í Barnalógini verður lagt upp til at skipa eina Barna- og familjueind.  Og tað fer eitt nýtt landsstýri eisini at taka støðu til.

Tað eru Almanna- og heilsumálaráðið, Barna- og útbúgvingarmálaráðið, Uttanríkis- og mentamálaráðið og Føroya Kommunufelag, ið standa aftan fyri Barnaverkætlanina.