Ein góður seyðahundur er sum ein vinur

Fimtan teir bestu seyðahundarnir, sum hava kappast í vetur, róku til Faroese National á Viðareiði um vikuskiftið.

Anna Sofía Fjallheim fór avstað við sigrinum á degnum saman við hundi sínum Lynn, meðan Tummas Jacobsen og hundurin Moss høvdu mest stig samanlagt og vunnu føroyameistaraheitið.

 - Ein góður seyðahundur verður sum ein vinur og vil fara langt fyri teg, siga tey bæði, sum hava vant og kappast við hundum í fleiri ár. 

Sjey FM-kappingar hava verið hesa sesongina. Fimm í heyst og tvær í vár. Úrslitini lagaðu seg soleiðis, at Anna Sofía Fjallheim, Tummas Jacobsen og Jónstein Petersen skulu umboða Føroyar til EM seinni í ár.