Allir hálvfinalistarnir funnir í kappingini um FM

StÍF vann í kvøld 36-28 á KÍF í fjórðingsfinaluni í Burn-deildini, og við sigrinum hjá strandingum eru allir hálvfinalistarnir í bestu hondbóltsdeildunum funnir.

Fyrr í dag vann VÍF 28-25 á Neistanum, og tískil skulu vestmenningar spæla ímóti H71 um pláss í FM-finaluni, meðan StÍF og Kyndil bresta saman.

Fyrsta hálvfinalan millum H71 og VÍF verður 2. páskadag, meðan Kyndil og StÍF helst spæla sín fyrsta dyst týsdagin. Spælt verður best av trimum um pláss í finaluni.

VÍF og Neistin sigraðu hjá kvinnum

í SMS-deildini vant VÍF burtur úr EB í fyrstu fjórðingsfinaluni. Vestmenningar vunnu heili 36-15 og tryggjaðu sær hálvfinaluuppgerð ímóti H71.

Neistin var omaná allan dystin ímóti Stjørnuni og vann trygt 23-20, hóast munurin til endans bert var trý mál. Tískil verður grannauppgerð í hinari hálvfinaluni í kvinnudeildini millum Neistan og Kyndil, sum longu hevur vunnið steypakappingina.

Fyrstu hálfinalurnar verða spældar hósdagin 16. apríl. Spælt verður best av trimum ein og hjá monnum.