Julian tók enn eitt met

Framgongdin hjá Juliani Gregersen heldur fram. Í fjør tók langteinarennarin úr Treysti fleiri føroysk met - millum annað gamla maratonmetið hjá Absaloni Hansen - og leygardagin setti hann enn eitt, tá DM í 10 kilometra renning var í Aarhus.

Albert Marni Joensen hevur átt hetta metið síðan 1994, men við tíðini 30:42 eyndaðist tað klaksvíkinginum at bøta um yvir 30 ára gamla metið við 14 sekundum.

SÍ EISINI: Tók eitt met fyri og annað eftir

Nógvir sterkir rennarar vóru við, millum annað danska methaldarin á teininum Joel Ibler Lillesø, og Julian Gregersen endaði á 18. plássi. Neli Heldarskarð, Ragnar Rasmussen og Steffan Kunoy vóru eisini við í kappingini.

Við nýggja metinum eigur Julian Gregersen nú øll tey føroysku metini í renning á vegi uttan eitt. Bert tað í 15 kilometrum hjá Alberti Marna Joensen restar nú í, og sum gongdin hevur verið síðstu tvey árini, eru stór sannlíkindi fyri, at Julian Gregersen fer at eiga tað eisini, áðrenn árið er runnið.