Ætlar at byggja 84 íbúðir norðan fyri Kringvarpið

Ætlanir eru um at byggja ein býling beint norðan fyri Kringvarpið.

Men serstaka byggisamtyktin fyri økið skal broytast fyrst.

Byggisamtyktin, sum kom í 2011, loyvir 18 grundstykkjum til sethús.

Kommunan hevur fingið umsókn frá tí, sum eigur trøðna, um at broyta serstøku byggisamtyktina, so hann kann byggja annað enn sethús. 

Ætlanin var byggja 96 íbúðir í átta bygningum, sum hava tvær ella tríggjar hæddir, umframt felagshús. 

Talið er síðani minkað niður í 84 íbúðir.

Skynsamari at byggja íbúðir

Umsitingin hjá býráðnum heldur, at tað er skynsamari at byggja íbúðir enn 18 sethús.

Hon hevur tí gjørt uppskot um nýggja serstaka byggisamtykt.

Atlit skulu takast til, at trøðin er beint við skógfriðað øki og tætt við Norðurlandahúsið.

Økið er 11.000 fermetrar.

Uppskot er um at kalla tað Ternutún.

Meirilutin í byggi- og býarskipanarnevndin mælir til at broyta byggisamtyktina.

Býráðið skal viðgera málið í dag.