Miðflokkurin fekk ikki nóg nógvar undirskriftir

Miðflokkurin ætlaði at fáa gildiskomuna hjá nýggju fosturtøkulógini útsetta til 1. januar 2027.

Hon er annars 1. juli í 2026. 

Men tað bar ikki til, segði Steffan Klein Poulsen, í formansrøðu sínari á landsfundi floksins leygardagin.

Av tí at tingárið er so langt liðið og seinasta freist farin, krevjast minst 17 undirskriftir frá tingfólki fyri at leggja fram lógaruppskot.

Og tær fekk Miðflokkurin ikki.

Hetta kemur tó ikki heilt óvart á meg, segði Steffan Klein Poulsen, tá hugsað verður um upplivingarnar í tingsalinum og í almenna kjakinum annars. 

Tí ofta eru tað somu fólkini, sum rópa harðast um fólkaræði og gjøgnumskygni, sum standa á odda fyri at køva talufrælsið við at gera seg til harrar yvir, hvat er legalt at siga í orðaskiftinum, segði Steffan Klein Poulsen.

Hann segði, at Miðflokkurin fer at virka fyri tí, hann kallar eitt betri alternativ, í næsta tingári.