Rúsan: Føroyingar keypa minni snaps og meira øl til ólavsøkuna

Sølan hjá Rúsdrekkasølu Landsins í juli verður væntandi nakrar hundrað túsund krónur meira í ár enn í fjør

Tann tiltikni snapsurin selur ikki longur eins nógv sum áður. Tann áður obligatoriski reyði Aalbog akvavitturin er nummar trý yvir mest seldu vørur av hesum slag hjá Rúsdrekkasøluni

Sigurjón Einarsson

28.07.2026 - 18:51

Ólavsøkuaftan og ólavsøkudag eru allar deildir hjá Rúsdrekkasølu Landsins stongdar, og tær lata ikki uppaftur fyrr enn tjóðarhátíðin er av.

Sambært Rúsdrekkasøluni bendir nógv á, at juli verður ein av bestu sølumánaðunum higartil í ár. Sølan verður væntandi nakrar hundrað túsund krónur meira enn í juli í fjør.

Seinastu árini hevur sølan í juli ligið millum 16,5 og 19 milliónir krónur. Í 2024 varð selt fyri 17,6 milliónir krónur, meðan tølini fyri í fjør ikki eru almenn enn.

Rúsdrekkasølan sigur eisini, at keypsvanarnir hjá føroyingum eru broyttir. Í dag verður minni keypt av sterkum alkoholi, meðan øl, vín og sokallaðar ready to drink-vørur vorðnir vanligari. Ready to drink-vørur eru liðugblandaðir alkoholiskir drykkir, sum eru klárir at drekka úr dós ella fløsku.

Sølan av siðbundnum brennivíni, eitt nú snapsi, er eisini minkað. Tann áður so vanligi reyði Aalborg akvavitturin er nú nummar trý á listanum yvir mest seldu vørur av hesum slag, upplýsir Rúsdrekkasølan Landsins.