Íslendsku samráðingarnar við ES kunnu broyta støðuna í Føroyum

Fólkaatkvøðan í Íslandi um at fara til samráðingar við ES um Íslendskan limaskap í handilssamgonguni er sera áhugaverd, tí at hetta kann koma at hava stóran týdning fyri Føroyar og Føroyska kjakið um ES-limaskap. Tað heldur Bárður á Steig Nielsen, landsstýrismaður í uttanríkismálum. 

 - Ísland er eitt samfelag sum eisini hevur øgiliga nógva fiskivinnu, og avbjóðingin í Føroyum at fáa uppbakning fyri at fara í dialog við ES er at fiskivinnan í ES-limalondum vanliga verður stýrd úr Brússel, og tað vilja føroyingar sjálvandi ikki hoyra talan um, tí at tað primert er tað vit liva av. So tað er øgiliga spennandi at fylgja kjakinum sum er í Íslandi.

Hoyr alla samrøðuna við landsstýrismannin her:

Ein kanning, sum varð gjørd í juni vísir, at góð 53 prosent av teimum, sum ætla at atkvøða í fólkaatkvøðuni, siga seg fara at atkvøða fyri.

Tað er ikki nógvur munur á hvussu menn og kvinnur svaraðu tá tey vóru spurd.

Tey, sum eru millum 40 og 49 ár taka í stórstan mun undir við nýggjum samráðingum um íslendskan ES-limaskap. 

Tey atfinningarsamastu eru fólk, sum eru 70 ár og eldri. 

Verður hugt eftir hvussu fólk atkvøða alt eftir hvar í Íslandi tey búgva sæst, at stórsta undirtøkan fyri nýggjum samráðingum er í høvuðsstaðarøkinum. Minsta undirtøkan er í eysturíslandi (Austurland), har bert 23,9 siga seg fara at svara ja í komandi fólkaatkvøðuni.

Stórsti hugburðsmunurin sæst, um hugt verður eftir politiskum tilknýti. Tey sum siga seg velja sosialliberala flokkin Viðreisn taka í nógv stórstan mun undir við nýggjum samráðingum ímeðan tey sum siga seg velja høgravendu flokkarnar miðflokkin og sjálfstæðisflokkin í nógv minstan mun siga seg fara at atkvøða ja.

Hóast undirtøku fyri samráðingum, sær tað út til, at tað framvegis er ein meiriluti av íslendska fólkinum, sum er ímóti íslendskum limaskapi í ES.

Tað skrivar íslendska kringvarpið.