Aron er seldur til Hearts

Aron Benjaminsen er seldur úr Víkingi til skotska felagið Hearts.

18 ára gamli høgri vongurin spælir sín síðsta dyst fyri Víking á hesum sinni fríggjakvøldið ímóti HB og verður tískil ikki við í steypafinaluni ímóti KÍ 5. september, skilir Kringvarpið.

Ikki er greitt, hvussu nógvan pening Víkingur fær fyri kvika vongin, men sum skilst er upphæddin niðanfyri eina millión krónur.

Áhugin hevur verið stórur fyri føroyinginum, sum hevur verið millum bestu álopsspælararnar í landinum hetta kappingarárið við níggju málum og átta uppleggum í Meistaradeildini, og síðstu dagarnar hava søgurnar um Hearts veruliga tikið dik á seg.

LES EISINI: Hearts vil hava Aron Benjaminsen

Sambært skotskum miðlum er Aron Benjaminsen funnin við hjálp frá Jamestown Analytics, sum arbeiðir við dátugrundaðari spælaraleiting fyri Hearts.

Hearts sær føroyska spælaran sum eina íløgu, ið kann mennast í skotskum fótbólti og seinni hava stórt virði fyri felagið, skrivar Edinburgh News.