Átta fólk deyð í ferjuvanlukku - 18 ikki komin afturíaftur

Átta fólk eru nú staðfest deyð, og 18 eru ikki afturíafturkomin eftir vanlukkuna norðan fyri Kýpros í Miðjarðarhavinum í gjár, tá ferðamannaskipið Filojet holvdist og sakk.

Tilsamans 267 fólk vóru við - 259 ferðafólk umframt manningina, sum taldi átta. 

Skipari og manning vóru bjargað, men eru síðan afturhildin av myndugleikunum í Norðurkýpros.

Hetta hevur forsætisráðharrin í Norðurkýpros, Ünal Üstel, upplýst sambært bretska kringvarpinum BBC.

Var á veg til Turkalands

Vanlukkan hendi tíðliga seinnapartin lokala tíð, tá skipið, ein tvíkilja, var á veg úr Kyrenia í Norðurkýpros til Taşucu í Turkalandi. 

Stutt eftir fráferð kom sjógvur í skipið, sum síðan koppaði. Tað fleyt eina løtu við bara kjølinum uppi, áðrenn tað sakk.

Norðurkýpros er turkiski-kýpriotiski parturin av Kýpros, sum hevur verið býtt í tvey síðan 1974, tá turkiskar herdeildir gjørdu innrás eftir eitt grikskt stuðlað kvett. 

Norðurkýpros lýsti seg sjálvstøðugt Í 1983 sum Turkiska lýðveldið Norðurkýpros, men tað verður bara viðurkent sum sjálvstøðug tjóð av Turkalandi.