Niels Midjord í miðdeplinum á Mentanardøgum í Fuglafirði

– Niels var ein, sum luttók í nógvum ymiskum virksemi, m.a sum arkitektur, tónleikari, sangari og umsetari, sigur Kristina Gry Berg, leiðari á Kunningarstovuni í Fuglafirði.

Niels Midjord er at síggja á skránni á Mentanardøgunum í Fuglafirði á ymiskan hátt. Millum annað verður ein sergjørd sjónleikakonsert við sangum, sum hann hevur sungið.

Til hesa konsertina luttaka Guðrið Hansdóttir, Benjamin Petersen og Dánjal á Neystabø.

Kristina Gry Berg sigur, at Mentanardagarnir hava stóran týdning fyri Fuglafjørð, tí fólk, feløg, fyritøkur og stovnar savnast um at skapa. Fleiri hugskot, sum eru sprottin úr Mentanardøgunum, hava eisini verið varandi í Fuglafirði.

– Mentanardagarnir eggja okkum til at vera skapandi. Ofta verður ymiskt roynt á fyrsta sinni hesar dagarnar, sum síðani verður verandi, sigur hon.

Á skránni á Mentanardøgunum eru konsertir, listaframsýningar, filmsýningar, fyrilestrar og matupplivingar, og tiltøk eru bæði fyri børn, ung og vaksin.

Mentanardagarnir vórðu settir í Fuglafjarðar kirkju í gjárkvøldið. Síðani varð farið í kirkjugarðin, har høvi var at minnast Niels Midjord og onnur, sum eru farin.

Hoyr innslag í útvarpstíðindunum: