Effo ákært fyri at bróta dátuverndarlógina - málið kemur fyri fríggjadagin

Føroya rættur fer fríggjadagin at viðgera eitt mál, um at Effo hevur brotið dátuverndarlógina.

Dátureftirlitið meldaði Effo til løgregluna og mælti til, at bótin verður 15 milliónir kr.

Tað var í mai í 2024, at Kringvarpið fyrstu ferð bar tíðindini um málið. Dátueftirlitið meldaði Effo 1. mai í 2024.

Men málið er eldri enn tað. Tað byrjaði í 2022, tá ið Effo sjálvt sendir Dátueftirlitinum eina fráboðan um trygdarbrot. Teldusníkar høvdu lopið á kt-skipanir hjá fyritøkuni.

Eingin váðameting

Í sínum kanningararbeiði staðfesti Dátueftirlitið, at fyritøkan onga váðameting hevði gjørt, áðrenn trygdarbrotið fór fram. Fyritøkan hevði heldur ongan skrivligan kt-trygdarpolitikk, hóast grannskoðarin tvær ferðir hevði biðið Effo um at fáa hesi viðurskifti í rættlag.

Eisini var niðurstøðan hjá Dátueftirlitinum, at teldusníkar mest sannlíkt høvdu tikið avrit av upplýsingunum í skipanini hjá fyritøkuni. 

Dátueftirlitið metti, at fyritøkan av grovum ósketni hevur brotið grein-46 í dátuverndarlógini, og tí valdi eftirlitið at melda málið til løgregluna.

Ríkisumboðið svaraði fyrispurningi

Lene Moyell Johansen, ríkisumboð, svaraði herfyri skrivligum fyrispurningi, sum Eirikur í Jákupsstovu, tingmaður, setti um málið, og har kom fram, at 22. mai í ár bleiv Effo ákært fyri at bróta dátuverndarlógina, og tað hevur danska løgmálaráðið fingið at vita frá ríkisadvokatinum.

Málið kemur Føroya Rætti fríggjadagin klokkan 9.15.