Rógvi og Lydia runnu skjótast til føroya vakrasta

Rógvi Kárason og Lydia í Lambanum runnu skjótast, tá Føroya vakrasta hálvmaraton var í Vágum leygardagin.

Hjá monnum kappaðist Rógvi Kárason, sum smbært tilmeldingarlistanum ikki umboðaði nakað felag, fyrst og fremst við Torbjørn Hentze úr Bragdinum.  

Munurin teirra millum gjørdist ikki so lítil. Rógvi Kárason kom á mál við tíðini 1.13.32, meðan Torbjørn Hentze rann teinin upp á 1.15.17.

Í triðja plássi var Mattias Jansson í Lambanum úr Roysninum við tíðini 1.22.02.

Lydia fremsta kvinnan

Hjá kvinnum var Lydia í Lambanum best. Rennarin úr Roysninum kom á mál við tíðini 1.40.57.

Í hølunum á henni kom Anne Havbo við 1.41.03, og bronsuna fekk Bjørt Krossteig, sum kom á mál ein góðan hálvan minutt seinni enn tær báðar fremstu.

Jens heiðurslimur í Frælsi

Í samband við Føroya vakrasta hálvmaraton varð veteranrennarin Jens R. Weihe gjørdur til heiðurslim í Ítróttafelagnum Frælsi í Vágum.

Hann spældi fótbólt og seinni innadura fótbólt, men ein krossbandsskaði gjørdi, at hann royndi seg við renning í staðin, skrivar Frælsi.

Hetta var í 2006, og síðan hevur hann verið ein íðin partur av føroyska renniumhvørvinum. Hann hevur runnið 16 maraton, og í ár hevur hann runnið øll seks føroyski hálvmaratonini - hetta sum 78 ára gamal. Síðani hevur Jens runnið 16 maraton og eitt stórt tal av hálvmaratonum og øðrum kappingum. Síðstu árini hevur hann runnið umleið 3.500 kilometrar um árið.

 - Tað eru ikki bara kilometrarnir, úrslitini og áhaldnið, sum gera hann serligan. Tað er minst líka nógv tann gleðin og jaligi hugburðurin, sum hann hevur við sær, tá hann fer út at renna, skrivar Frælsi um Jens R. Weihe.