Ein milliard til Vestmanna

Fýra krónutøl eru í svarinum, Jacob Vestergaard hevur givið tingmanninum Grími Sundstein, sum spurdi eftir Vestmannatunlinum. Munurin á lægsta og hægsta tali er næstan ein hálv milliard.

Løgtingsmaðurin spurdi annars ikki eftir kostnaðinum. Hann spurdi, nær væntandi verður klárt at prosjektera tunnilin til Vestmanna, um landsstýrismaðurin ætlar at leggja verklagslóg fyri tingið hesa tingsetuna, og um landsstýrismaðurin ætlar at raðfesta Vestmannatunnilin frammarliga í nýggju langtíðarætlanini.

Jacob Vestergaard, landsstýrismaður í tunnilsmálum, upplýsir í svarinum, at Landsverk hevur arbeitt við tveimum ymiskum tunnilsloysnum. Einum 4,2 km longum tunli úr Kvívík til Vestmanna og einum 6,2 km longum tunli úr Leynum til Vestmanna.

Milliardin spøkir

Stytri tunnilin, millum Kvívík og Vestmanna, er mettur at kosta 550 milliónir krónur. Við 30% váðaískoyti er kostnaðurin 715 milliónir.

Longri tunnilin, millum Leynar og Vestmanna, er mettur at kosta 800 milliónir. Við 30% váðaískoyti kostar tunnilin umleið eina milliard krónur.

Jacob Vestergaard upplýsir, at málið er at fáa allar fyrireikingar til Vestmannatunnilin lidnar í 2027, so verkætlanin verður klár at bjóða út, tá peningur verður tøkur til endamálið.

Til spurningin, um Vestmannatunnilin verður raðfestur frammalaga, svarar landsstýrismaðurin soleiðis:

- Árligi íløgukarmurin verður á leið 600 milliónir krónur næstu árini. Tað er trupult at raðfesta íløgurnar, tí tørvurin er sera stórur, bæði innan samferðslumál og flest onnur málsøki.