Varpar ljós á alzheimer

Í dag er altjóða alzheimerdagur, og í Føroyum er dagurin serliga merkisverdur, tí júst í ár eru 25 ár liðin, síðani Alzheimerfelagið varð stovnað. Hesi 25 árini verða hátíðarhildin við eini stórari ráðstevnu í Norðurlandahúsinum, har endamálið er at varpa ljós á demensøkið og tey mongu, hvørs gerandisdagur er merktur av hesari sjúku.

Millum høvuðsfyrilestrarnar á ráðstevnuni er Flemming Østergaard, fyrrverandi stjóri og nevndarformaður hjá FCK og felagnum Parken Sport & Entertainment.

Flemming er aktuellur við nýggjari bók, ið kom út í mai í ár. Bókin er ein persónlig lýsing av tí lívsbroyting, sum hendir, tá ið makin fær staðfest demens ella alzheimer.

Harumframt viðger hann ta tungu veruleikastøðu, sum nógv avvarðandi kenna alt ov væl: Hvat hendir, og hvat gert tú, tá ið samfelagsliga trygdarnetið svíkur, og almenna ábyrgdin ikki røkkur til hjá teimum, ið hava mest brúk fyri hjálp.

Lívið sum avvarðandi at einum við alzheimer er mangan fult av ósvaraðum spurningum, tungum avgerðum og eini kenslu av at standa einsamallur. Við at deila sína egnu søgu – bæði í bókini og á pallinum í Norðurlandahúsinum – vónar Flemming at kunna hjálpa øðrum í líknandi støðu og vera við til at bróta niður tey tabu, ið framvegis eru knýtt at demenssjúkum.

Øll samrøðan við Flemming Østergaard kann hoyrast her: