Ukraina-stuðul vunnið valið í Lettlandi

Sitandi forsætisráðharrin í Lettlandi, Andris Kulbergs, stendur til at vinna tjóðartingsvalið, sum var í landinum í gjár.

Tá 88 prosent av atkvøðunum vóru tald upp, stóð flokkurin hjá honum, Sameindur listi, til at fáa 36 prosent av atkvøðunum. Næstur honum kom flokkurin Lettland fyrst, sum stóð til at fáa 13,3 prosent.

Tað varð væntað, at Kulbergs fór at vinna valið, men ikki, at talan fór at verða um stórsigur, soleiðis sum alt nú bendir á.

Vinnulívsmaðurin Andris Kulbergs er rættiliga nýggjur í lettlendskum politikki. Hann kom á ting fyrstu ferð í 2022, og tá stjórnin í mai mánaði misti sín meiriluta í tinginum og táverandi forsætisráðharrin Evika Silina legði frá sær, tók Andris Kulbergs við sum stjórnarleiðari.

Valúrslitið er góð tíðindi fyri Ukraina og NATO. Andris Kulbergs er sera atfinningarsamur móti Russlandi og vesturlendskt sinnaður, eins og hann er dyggur stuðul hjá Ukraina. Hann boðaði eisini frá áðrenn valið, at hann ikki er áhugaður í at samstarva við pro-russiskar flokkar í eini komandi stjórn.

Stúrt varð fyri, at Russland fór at royna at ávirka og sabotera valið í Lettlandi, men hóast onkrar fráboðanir hava verið um okkurt óreglusemi, hevur tað als ikki verið so víttfevnandi, sum stúrt varð fyri undan valinum.

100 tingsessir eru í lettlendska tjóðartinginum Saeima.