Landið eigur at yvirtaka kommunulæknarnar

Nú ætlanin er gera nakrar heilsudeplar, har millum annað kommunulæknar skulu vera, er spurningurin, um vit ikki júst nú eiga at samráðast um at leggja kommunulækna-skipanina heilt og fult til landið, sigur Steinbjørn O. Jacobsen.

Hann sigur, at verandi skipan, har kommunurnar rinda viðtaluhøli, útgerð, bústað til avloysarar, ja, snøgt sagt karmarnar, hava kommunurnar onga ávirkan á, hvussu kommunulækna-skipanin verður stýrd og rikin.

Tað avger landið. 

Tí spyr virkandi borgarstjórin í Klaksvík, um ikki er vert at royna at hava bæði fíggjarliga partin og umsitingarliga partin hjá sama myndugleika, hjá landinum.

Tí felags ábyrgd kann lættliga enda við ongari ábyrgd, sigur Steinbjørn O. Jacobsen. 

Hann vísir á, at Heilsumálaráðið hevur allan avgerðarrættin um innihaldið í kommunulæknaskipanini. Men kommunurnar gjalda stóran part av tí, sum krevst fyri at skipanin skal virka.