Damanaki ætlar at loysa stríðið um norðhavssildina

Tað segði Maria Damanaki í fiskivinnunevndini hjá ES-tinginum í gjár, sambært donsku heimasíðuni Fagpressen. 

- Vit hava gott samband við Noreg og Føroyar. Fiskiskapurin kann takast uppaftur, og samráðingar eru longu við føroyingar, segði fiskivinnukommisserurin. 

Hon vísti á, at handilstiltøk eru sett í verk móti Føroyum, tí ósemja er um sildina, men nú semja er gjørd um makrelin ber til hjá føroyskum skipum eisini at fiska makrel í ES-sjógvi. 

Hinvegin segði Maria Damanaki, at handilstiltøkini verða verandi í gildi, eydnast tað ikki at fáa semju við føroyingar um sildina. 

Ísland er ikki við í makrelavtaluni, men hevur fingið tillutað 15,6 prosent av heildarkvotuni.

Maria Damanaki segði, at Grønland, beint fyri at skrivast skuldi undir avtaluna, kravdi at fáa 100.000 tons. 

- Hetta er meiri enn royndarfiskiskapur, og eg lurti eftir øllum góðum uppskotum um, hvussu Grønland skal handfarast, segði ES-fiskivinnukommisserurin.

Grønland vil hava støðu sum strandaland saman við ES, Noregi, Føroyum og Russlandi.

Írski limurin í fiskivinnunevndini í ES-tinginum fanst at Mariu Damanaki fyri at drála við at seta tiltøk í verk móti Íslandi. 

Fiskivinnukommisserurin svaraði, at allir møguleikar verða kannaðir, men tað er ES-ráðið, sum endaliga ger av, um tiltøk skulu setast í verk, segði hon.