Almennar nevndarsamsýningar hækka í Grønlandi

Samstundis sum føroysku polittikararnir vilja skerja nevndarsamsýningarnar í almennum feløgum, so ger Grønland tað mótsatta.
Grønlendsk Kringvarpið skrivar, at har hava nevndarsamsýningarnar staðið í stað síðani í 2009, men av tí at arbeiðsbyrðan er ymisk, hevur landsstýrið gjørt av at broyta mannagongdina.
Tað hevur við sær, at nevndarformaðurin í Royal Greenland, størsta almenna felagnum, fær 500.000 kr. um árið, næstformaðurin 300.000 kr., og hinir nevndarlimirnir 200.000 kr. um árið í nevndarsamsýning.
Í Air Greenland, Royal Arctic Line, Tele Greenland, Bústaðarfelagnum INI, og í Greenland Holding fær formaðurin 350.000 kr., næstformaðurin 175.000 kr., og hinir nevndarlimirnir 125.000 kr.
Í feløgunum Nuna Oil, Greenland Oil Spill, Visit Greenland og í Great Greenland fær formaðurin 150.000 kr., næstformaðurin 75.000 kr., og hinir nevndarlimirnir fáa 50.000 kr.
Frammanundan hava nevndarlimirnir fingið nevndarsamsýning eftir umsetninginum hjá feløgunum. Formenn hava fingið millum 100 og 400.000 kr., næstformenn millum 50 og 300.000 kr., og hinir nevndarlimirnir millum 50 og 200.000 kr. í nevndarsamsýning um árið.
Endamálið hjá grønlendska landsstýrinum at hækka nevndarsamsýningarnar er at fáa so góð fólk sum gjørligt í nevndirnar og at tey skulu arbeiða meir fyri at menna feløgini.