Ættleiðingarstuðulin hækkar

Løgtingið hevur samtykt at hækka ættleiðingarstuðulin úr 75.000 upp í 100.000 krónur.

Tað er vorðið alsamt dýrari at ættleiða. Í 2009 kostaði tað um 95.000 kr., og í 2013 kostaði tað 154.000 kr. at ættleiða eitt barn. 

Afturat hesum koma útreiðslur til eitt nú lækna, koppseting, ferðing, uppihald í landinum, haðani barnið kemur, og tað er eisini vorðið dýrari seinastu árini.

Talið av ættleiðingum í Føroyum er minkað seinnu árini. 

Ættleiðingarnar hava verið 10 - 14 um árið, men í 2012 vórðu einans fimm børn ættleidd, og í fjør vóru tey trý.

Hinvegin er talið av ættleiðingarforeldrum, ið verða góðkend, støðugt - í meðal níggju góðkenningar um árið.

Í løtuni eru 28 góðkend foreldur, ið bíða eftir at fáa eitt barn boðið.