Ivi um gegnið hjá kærdum borgarstjóra

Heðin Mortensen, borgarstjóri, var møguliga ógegnigur, tá Tórshavnar býráð fyri skjótt sjey árum síðani, 11.oktober í 2007, viðgjørdi mál um leigutraðir.

Men kommunala eftirlitið kann ikki ógilda avgerðina, sum býráðið tók, tí avgerðin er framd í verki.

Tað sigur danski løgfrøðiprofessarin, Karsten Revsbech, sum Løgmansskrivstovan vendi sær til, tá Marin Katrina Frýdal, býráðslimur, í 2009 kærdi Heðin Mortensen. 

Marin Katrina Frýdal kærdi til Innlendismálaráðið, tí Heðin Mortensen var við í viðgerðini í býráðnum, hóast hann sjálvur leigar trøð frá kommununi. 

Annika Olsen, sum tá var landsstýriskvinna í innlendismálum, helt seg vera ógegniga at viðgera kæruna, sum tí endaði hjá løgmanni.

Bað um upprit

Løgmansskrivstovan bað Karsten Revsbech um eitt upprit, sum kom í november 2010.

Niðurstøðan hjá løgfrøðiprofessaranum er, at Heðin Mortensen var ógegnigur á býráðsfundinum. 

Men hann ger samstundis vart við, at kjakast kann um hesa niðurstøðuna. Til dømis gjørdi atkvøðan hjá Heðini Mortensen ongan mun, tí býráðið samtykti málið við atkvøðunum 9-4. 

Arvarætturin avmarkaður

Býráðið broytti reglurnar, so traðirnar nú ikki longur ganga í arv í fleiri ættarlið, men bara eina ferð.

Kortini eru góðar grundir at halda, at avgerðin hjá býráðnum er ógildug júst tí, at borgarstjórin var við í viðgerðini.

Men av tí at avgerðin er framd, ber ikki til at ógilda hana, sigur Karsten Revsbech.

Og í januar 2011 svarar løgmaður Marini Katrinu Frýdal, at Karsten Revsbech ikki er ivaleysur í sínari niðurstøðu um gegnið hjá Heðini Mortensen. Men tá kommunala eftirlitið ikki kann ógilda avgerðina hjá býráðnum, ger løgmaður ikki meira við kæruna.