Føroyingar runnið maraton og spartatlon í Evropa

Valborg Heinesen vann bronsu i Danmarskmeistarakappingina í marathon, sum var í Odense í gjár, og hon setti eisini nýtt føroyskt met

Tíðin hjá Valborg í gjár var 2.49.37. Gamla metið átti Joan Bláfoss, tað var 2.50.27. Valborg var nummar 5 fyrstu kilometrarnar, og eftir góðar 30 km rann hon triðfremst. 

Hon kom í mál sum nummar trý, bert 25 sek. aftaná silvurvinnaranum, skrivar FÍF, Felagið fyri frælsan ítrótt, frá.

Maraton í Berlin

Marna Egholm luttók fyri fyrstu ferð í Berlin maraton, men hóast hetta megnaði hon at koma í mál sum nummar 20 av øllum kvinnunum. Bert sjey kvinnur úr Evropa vóru framman fyri hana. Tíðin hjá Marnu var 2.52.00.

Spartatlon í Grikkalandi

Eisini í Grikkalandi var renning á skránni í gjár, og tá megnaði Pól Sundskar at gjøgnumføra tiltikna Spartatlon. Ein kapping á heilar 246 kilometrar, sum luttakararnir skulu renna innan 36 tímar.

Pól hevur roynt hetta fyrr, men mátti tá gevast vegna hita. Í ár lá betri fyri, tí hann megnaði at basa teimum 246 kilometrunum uppá 35 og ein hálvan tíma, skrivar FÍF.