Tingfólk geva Sea Shepherd durafjórðingin

Tjóðveldi fær undirtøku í løgtinginum fyri uppskotinum um at biðja landsstýrið skjótast gjørligt koma við lógarbroytingum, so til ber at nokta fólki at sleppa inn í landið, sum ætla at bróta lógir ella hótta lóglig rættindi í Føroyum.

Uppskotið kom í kjalarvørrinum av tiltøkunum hjá Sea Shepherd í Føroyum í summar.

Rættarnevndin hjá løgtinginum mælir tinginum til at samtykkja uppskotið, men tó við teirri broyting, at skjótast gjørligt verður í seinasta lagi 1.mai næsta ár.

Rættarnevndin mælir eisini til at strika orðið einstaklingar í uppskoti Tjóðveldis. Eftir stendur orðingin at forða umboðum fyri felagsskapir, sum hava til endamáls at fremja ólógligt virksemi ella hótta lóglig rættindi í Føroyum, at koma til landið ella útinna fyrireikingar til tílíkt virksemi í Føroyum.

Politiið er annars liðugt at eftirmeta, hvussu tað stóð seg í summar, tá Sea Shepherd var her. Seinasta hond verður løgd á eftirmetingina mikudagin.

Slíkar eftirmetingar eru ikki almennar, men sum skilst er politiið nøgt við sítt arbeiði í summar.