Meirilutin: Ikki neyðugt at lýsa móðurmálsdag

Tað er óneyðugt, at løgtingið skal lýsa ein árligan móðurmálsdag.

Tað ber til at hava slíkan dag kortini, heldur meirilutin í Mentanarnevndini hjá løgtinginum.

Meirilutin, samgongan og Javnaðarflokkurin, mælir løgtinginum frá at samtykkja uppskotið hjá Tjóðveldi um at fáa landsstýrið at leggja fyri tingið uppskot um at lýsa 25. mars sum almennan móðurmálsdag.

Tað hevur víst seg, sigur meirilutin, at tað ber til at skipa fyri móðurmálsdegi, uttan at hetta verður gjørt við at lýsa ein almennan hátíðardag afturat. 

Mælt verður til at brúka teir møguleikar, sum longu eru, at skipa fyri einum árligum móðurmálsdegi tann 25.mars.

Landsstýrismaðurin í mentamálum hevur longu sum er møguleika fyri at geva stovnum boð um at skipa fyri degnum, sigur meirilutin í Mentanarnevndini. 

Minnilutin í nevndini, Tjóðveldi og Framsókn, sigur tað vera neyðugt, at Mentamálaráðið tekur á seg at lýsa 25. mars sum almennan móðurmálsdag fyri at stovnar, skúlar og einstaklingar taka móðurmálsdagin til sín.