Viðgera pensjónshækkingina í dag

Løgtingið fer í dag at viðgera uppskotið hjá Anniku Olsen, landsstýriskvinnu, um at hækka viðbótina til fólkapensjónistar 1. juli. 

Hækkingin verður 350 kr. um mánaðin, ella 4.200 kr. um árið.

Neyðugt verður at biðja um eykajáttan frá løgtinginum, fyri at seta viðbótina í verk, tí bara10 milliónir kr. eru játtaðar á fíggjarlógini til endamálið, men tørvurin í ár verður 13,7 milliónir kr. Tí má løgtingið játta 3,7 milliónir kr. aftrat til ætlanina.

Næsta ár verður hækkingin galdandi alt árið, og tá verður tørvurin 23,1 milliónir kr.

Nakað av pengunum fáa landið og kommunurnar aftur í skatti -  í ár 4,8 milliónir kr. og næsta ár 8,2 milliónir kr., sæst í viðmerkingunum til uppskotið.