Patrik Johannesen skal verja málið hjá TB

TB er komið í eina heilt serliga støðu.

Málverjin, Ivan Stojkovic, fekk reyða kortið í dystinum móti ÍF, og felagið hevur ongan royndan málverja til komandi dyst.

Í dystinum móti ÍF valdi TB, at Patrik Johannesen fór í málið, og hann kom bara heilt væl frá tí.

Patrik hevði bara verið í málinum í fá sekund, tá ÍF skoraði við fríssparki, men annars stóð hann sera væl, og bjargaði fleiri skotum.

Sleppa ikki at leiga annan málverja

Jón Johannesen formaður í fótbóltsdeildini, sigur, at TB hevur kannað, um tað ber til at leiga annan málverja, men tí loyva reglurnar ikki.

Hugin Albinus er málverji í 2.deild, men hann er ikki tøkur sunnudagin.

Hin møguleikin er átjan ára gamli, Boas Nitscke, men hann hevur ongar royndir í vaksnamannafótbólti, og fær neyvan sín elddóp sunnudagin.

Tí bendir í løtuni alt á, at Patrik Johannesen, sum annars er offensivur miðvallari, skal verja málið hjá TB sunnudagin, tá tvøramenn spæla móti EB/Streymi við Margáir.

Patrik Johannesen, sum er 19 ára gamal, royndi seg fyri nøkrum árum síðani sum málverja í ungdómsdeildini, tá hann spældi fyri U14.