Felag í Belis keypt Asbjørn Senior

Nótaskipið Asbjørn Senior varð í gjár selt av landinum og strikað í føroysku skipaskránni.

Nýggi eigarin er North Atlantic Group Ltd í Belis, sum keypti skipið frá Ocean Group Faroes fyri 67 mió. kr., júst tað sama, sum Ocean Group Faroes keypti Asbjørn Senior fyri í fjør. 

Asbjørn Senior varð keyptur til Vágs úr Hirtshals fyri einum ári síðani. 

Skipið varð skrásett í Føroyum fyrstu ferð tann 22.juli í fjør. Í fyrsta umfari fekk skipið føroyskt flutningsloyvi.

Skipið varð selt fleiri ferðir aftur og fram úr Vági til ymisk feløg í Thor-samtakinum í Hósvík, sum høvdu makrelkvotur. Í fjør avreiddi Asbjørn Senior makrel fyri 32 milliónir krónur.

Í løtuni er Asbjørn Senior staddur úti fyri Móritania í Afrika.