SEV: Loysti seg at seta vindmyllur upp í Húsahaga

Fyrsta árið, vindmyllurnar í Húsahaga mólu, framleiddu tær grøna orku til umleið 7.000 húsarhald, sigur SEV, nú vindmyllulundin er eitt ár

Vindmyllurnar í Húsahaga hjá SEV framleiddu 11 prosent av orkutørvinum fyrsta árið, sigur SEV, nú eitt ár er liðið síðani vindmyllulundin varð sett til

Sigrún H. Brend

Bjarni Mohr

22.10.2015 - 12:16

Vindmyllulundin í Húsahaga var frambrot innan grøna orkuveiting í Føroyum, tá hon varð sett í rakstur í fjør.

Tað sást aftur á lutfallinum av grønari orku hjá SEV, og seinasta árið er tað fleiri ferðir komið fyri, at øll orkan hjá SEV er komin frá varandi orkukeldum, skrivar SEV í tíðindaskrivi.

11 prosent av øllum orkutørvinum

Vindmyllulundin í Húsahaga hevur síðani níggjunda oktober fjør framleitt 34 GWt av elorku. Tað svarar til umleið 11 prosent av orkutørvinum hjá SEV.

Verður hetta umroknað til húsarhald, so svarar tað til grøna orku til umleið 7000 húsarhald seinasta árið. Men sjálvar vindmyllurnar eru einans fyrsta stigið.

Fyrst í komandi ári verður battarískipan sett upp, sum skal javna orkuna úr vindinum út á elnetið, so uppaftur meira grøn orka fæst inn á netið hjá SEV.