Goyma IP-adressu hjá føroyingum á netinum í eitt ár

Politiið vil skráseta upplýsingar um, hvør føroyingur hevur hvørja IP-addressu á internetinum, og goyma hesar í eitt ár.

- Hetta er neyðugt, fyri at vit kunnu avdúka brotsverk á netinum, har einasta upplýsingin vit hava, er júst IP-addressan, sigur Katrin Thorsvig Hansen, høvuðsákæri.

Hon leggur dent á, at skrásetingin fevnir ikki um, hvat vit gera á netinum.

Upplýsingar um IP- addressurnar siga einans nakað um, hvør eigur beinaran/routaran, sum hevur samband við internetið.

Kaféir, matstovur, almennir stovnar og nógv onnur deila atgongdina til internetið - og tá verður eigarin av IP-addressuni fyrsta stigið hjá løgregluni.

Sí innslag í Degi og Viku og samrøðu við Bárð Christiansen, KT-serfrøðing, sum var gestur í sjónvarpsstovuni.