Triðingurin av læraralesandi mannfólk

Sostatt kunnu vit útleiða, at umleið triðingurin av lærarahópinum í framtíðini vera mannligir lærarar. Hetta skrivar skúlablaðið á heimasíðu síni.

Tað er eitt sindur misjavnt, hvussu stórir árgangirnir av læraralesandi eru. Í løtuni eru 141, ið lesa til lærara; tá eru tey, sum eru í farloyvi ikki tald við.

Av teimum, sum vórðu liðug sum lærarar í summar, vóru 28 prosent mannfólk, í fjør 21 prosent og fyrraári 30 prosent. Tølini eru smá, og tað skulu bara lítlar broytingar til, so broytist myndin. Vit kunnu tí við fyrivarni siga, at broytingin til bachelor hevur ávirkað áhugan fyri læraraútbúgvingini millum mannfólk rætta vegin. Í seinasta flokkinum, sum las til lærara sambært gomlu útbúgvingini, vóru 21,7 prosent mannfólk. Í øllum árgangunum síðan er talið á mannfólki, sum lesa til lærara, kvinkað uppeftir.

Tað hevur mangan verið frammi, at áhugin millum mannfólk fyri læraraútbúgvingini er serliga treytaður av, hvussu konjunkturirnir í samfelagnum eru. Er nógv ferð á, arbeiðstilboðini mong og tískil stórir møguleikar at vinna stórar lønir, minkar áhugin millum mannfólk fyri læraraútbúgvingini. Tá ið gongdin vendir, so økist áhugin fyri læraraútbúgvingini millum mannfólk. Hvussu er og ikki, so hevur áhugin fyri læraraútbúgvingini seinastu árini verið rættiliga støðugur.

Hví áhugin millum konufólk fyri læraraútbúgvingini ikki er so treytaður av konjunkturunum, er ein annar góður spurningur. Sambært Hagstovuni var kynsbýtið skúlaárið 2010-2011 39% menn og 61% kvinnur. Gongdin at konufólk gerast fleiri fer at halda fram. Seinni fer talið helst at stabilisera seg á ávikavist 30% og 70%, stendur at lesa á heimasíðuni hjá skúlablaðnum.