Danskir fiskimenn taptu í Hægstarætti

Tað er ólóligt at fiska á eini ávísari leið í Kattegat, og danska lógin stríðir ikki ímóti ES-rættinum. Hægstirættur hevur dømt í einum máli

Hægstirættur hevur dømt í einum máli um fiskiskap í Kattegat. Tað er ólóligt at fiska á eini ávísari leið í Kattegat, og danska lógin stríðir ikki ímóti ES-rættinum

Johnsigurd Johannesen

Bjarni Mohr

05.04.2016 - 16:44

Tríggir fiskimenn í Gilleleje vórðu í 2010 ákærdir fyri at bróta forboðið fyri at fiska á eini leið í svenskum sjógvi í Kattegat, sum er stongt til tess at verja stovnin.

Fiskimenninir taptu eisini í býar- og landsrættinum, og skutu síðani dómin inn fyri Hægstarætt. Fiskimenn í øðrum londum enn Danmark og Svøríki kunnu fiska á stongdu leiðini, tí tað er ES, sum hevur lóggávuvald á økinum.

Ger Danmark sína egnu lóg um forboð fyri at fiska í donskum ella útlendskum øki, er lógin bara galdandi fyri danskar fiskimenn.

Í løtuni eru fleiri onnur líknandi mál, sum Hægstirættur skal taka støðu til. Danska fiskimannafelagið sigur, at tað hevur havt stórar avleiðingar fyri gamla fiskivinnubýin Gilleleje, og nógvir fiskimenn eru givnir.