Royndaruppboðssølan endaliga samtykt

Men botnfiskurin úr Barentshavinum, sum verður keyptur á uppboðssølu, skal bjóðast út til føroysk virki.

Løgtingið samtykti mikukvøldið eitt broytingaruppskot frá samgonguumboðunum í Vinnunevndini, Bjarna Hammer, Bjørt Samuelsen og Ingolf S. Olsen, og Kristini Michelsen um nýggjar treytir fyri botnfiskinum í Barentshavinum.

SÍ EISINI Royndaruppboðssølan samtykt við aðru viðgerð

Broytingaruppskotið varð samtykt við 17 atkvøðum fyri og 14 ímóti. Tá Løgtingið atkvøddi um lógina soleiðis broytta, var munurin uppaftur minni, 16 atkvøður fyri og 15 móti.

Sambært lógini um royndaruppboðssøluna fær landsstýrismaðurin í fiskivinnumálum heimild at selja 9.000 tons av makreli, 4.000 tons av norðhavssild, 20.000 tons av svartkjafti og 3.000 tons av botnfiski í Barentshavinum á uppboði.

Kemur í gildi um eina viku

Fiskurin úr Barentshavinum skal bjóðast út til føroysk virki eftir treytum, sum landsstýrismaðurin ásetur í kunngerð. Lógin um royndaruppboðssøluna kemur í gildi 15. apríl.

Høgni Hoydal, landsstýrismaður, sigur, at hann er væl nøgdur við úrslitið, hóast tað tók tinginum nærum fýra mánaðir at avgreiða málið um royndaruppboðssøluna.

Jacob Vestergaard í Fólkaflokkinum, sum saman við hinum í andstøðuni hevur funnist hvassliga at uppboðssøluni, sigur, at ótryggleikin í vinnuni verður uppaftur størri.