Lýsa aftur eftir aðalstjóra fyrsta dagin

John Rajani var ikki einasti umsøkjarin, sum varð innstillaður til starvið sum aðalstjóri í Vinnumálaráðnum.

Ein annar umsøkjari varð eisini innstillaður, men kortini avgjørdi løgmaður at lýsa starvið leyst av nýggjum.

Aksel V Johannesen, løgmaður, sigur við útvarpið í morgun, at hann hevur ikki aðrar viðmerkingar til málið enn tað, sum hann hevur sagt fyrr, og tað er, at hann vil hava fleiri væl skikkaðar umsøkjarar til starvið.

Hann vil ikki svara, hví tann, ið varð innstillaður sum nummar tvey, ikki fekk starvið.

Tað er ikki fyrstu ferð, at ein politikari setur ein annan aðalstjóra enn tann, sum setanarbólkurin instillar sum nummar eitt.

Politiskt rumbul

Seinnu árini eru fleiri aðalstjórasetanir endaðar í politiskum rumbli.

Tá Rúni Joensen, sum nú situr í setanarbólkinum, varð settur sum aðalstjóri í táverandi løgmálaráðnum, var hann ikki fyrsta valið hjá setanarbólkinum. Men táverandi løgmaður og táverandi landsstýrismaðurin, Høgni Hoydal, valdu hann fram um tann, sum setanarbólkurin mælti til at seta.

Og tá ið Herluf Sigvaldsson varð settur sum aðalstjóri á táverandi Uttanríkiráðnum, var hann triðja val hjá meirilutanum í setanarnevndini, men fyrsta val hjá landsstýrismanninum tá, Jørgeni Niclasen. 

Hesaferð er tann, sum er innstillaður sum nummar tvey, ikki settur, men avgjørt er at fara undir setanartilgongdina av nýggjum.

Lýsingin kemur skjótt

Tað vóru upprunaliga 10 umsóknir til starvið, men tvær umsóknir vórðu tiknar aftur. Setanarbólkurin hevur mett, at ein var sera væl skikkaður, og ein var væl skikkaður, og innstillaði tí tvey fólk til starvið. 

Á Løgmansskrivstovuni vita tey í dag ikki at siga, nær starvið sum aðalstjóri í Uttanríkis- og vinnumálaráðnum verður lýst leyst av nýggjum, men tað verður skjótt, verður sagt.