Bilseljarar fáa ikki nummarpláturnar

Bilasølurnar sleppa ikki at umsita nummarplátur til bilar. Akstovan hevur ongar ætlanir um at lata bilasølurnar útflýggja teimum, sum keypa nýggjar bilar, nummarplátur.

Tað sigur Henrik Old, landsstýrismaður, sum hevur svarað spurningi frá Birni Kalsø, løgtingsmanni.

Bjørn Kalsø sigur, at fólk uttan fyri Havnina, har Akstovan er, noyðast í ringasta føri at bíða í nakrar dagar eftir nummarplátunum, tá tey keypa sær bil.

Heldur tað hevði lætt um

Fert tú eitt nú úr Suðuroynni til Havnar at keypa bil, fært tú ikki bilin suður fyrr enn nakrar dagar seinni, tí Akstovan letur aftur klokkan trý seinnapartin og er ikki opin um vikuskiftið, sigur Bjørn Kalsø.

Tí hevði tað lætt um hjá teimum, sum keypa bil, at tey samstundis kunnu fáa nummarpláturnar frá bilseljaranum, heldur løgtingsmaðurin. Hann sigur, at í øðrum londum umsita bilasølurnar nummarpláturnar.

Henrik Old svarar, at Akstovan er skrásetingarmyndugleiki og eftirlitsmyndugleiki, sum millum annað skal ansa eftir, at nýggir bilar eru ábyrgdartryggjaðir og, at landskassin fær tey gjøld, hann eigur, fyri bilin, áðrenn bilurin verður skrásettur og fær sínar plátur.