Fingið undantaksloyvi til taðing

Í sambandi við breiðkan av vegi, hevur Landsverk ætlan um at sáa í benið, og tí er søkt um undantaksloyvi at taða øki í Neytaskriðuni á Gjáarvegnum.

Umhvørvisstovan heldur, at tað hevur týdning, at sátt verður í øki, sum verða løgd ber í sambandi við vegagerð og annað fyri at forða fyri erosjón.

Kann kærast til 3. august

Í loyvinum er tó treyt sett um, at taðast skal bara á økinum, har svørðurin er grivin omanav. Avgerðin kann kærast til Innlendismálaráðið.

Kærurætt hava tey, sum avgerðin hevur týðandi persónligan týdning fyri, skrivar Umhvørvisstovan á heimasíðuni hjá stovninum.

Kæra skal sendast Umhvørvisstovuni, ið skal hava kæruna í seinasta lagi um fýra vikur, mikudagin 3. august 2016.