Órógvar náttarsvøvnin hjá íslendingum

Norröna larmar so illa, meðan hon liggur á Seyðisfirði, at fólk har sova við oyraproppum. Ein maður, sum býr á Seyðisfirði, gevur ilt av sær um stóru skipini, sum koma til Seyðisfjarðar.

Í summar vóru 34 ferðafólkaskip á Seyðisfirði, og næsta ár verða tey fleiri. Hesi skipini hava nógvan gang og dálka harafturat illa.

Sigurður Gunnarsson heitir í lesarabrævinum á havnarmyndugleikarnar um at gera okkurt við málið. Hann er ikki einsamallur.

Heita á býráðið um at gera okkurt

Ein borgarafundur samtykti herfyri einmælt at heita á býráðið um at gera okkurt. Men einki er hent. Sigurður Gunnarsson skrivar, at ringast er um veturin, tá Norröna liggur hálvt annað samdøgur á Seyðisfirði.

Tá Norröna liggur hálvt annað samdøgur á Seyðisfirði er neyðugt at sova við oyraproppum, tí ljósmotorarnir hjá Norrönu larma so illa. Borgarafundurin minti býráðið á ES-reglur frá í fjør.

Sambært reglunum, ið eisini eru galdandi í EFTA, har sum Ísland er limur, eiga skip, sum liggja við bryggju longri enn tveir tímar, at taka streym úr landi, um tað er gjørligt. Og tað ber til at fáa streym úr landi á Seyðisfirði.