Nýtt ÍSF-hús oman á Fimi

ÍSF vil hava nýtt høvuðssæti til virksemið hjá sær og hølir til sersambondini. Samskiftið hevur verið millum Tórshavnar kommunu og ÍSF um nýtt høvuðssæti.

Á fundi 4. oktober komu kommunan og ÍSF at kalla ásamt um eina avtalu um, at nýggja ÍSF-húsið skal byggjast omaná fimleikahøllina Fimi í Gundadali.

Í óbindandi uppritinum til leiguaavtalu fyri lendið, Kringvarpið hevur fingið innlit í, sæst, at ÍSF-skal gjalda 5.000 krónur í árligum leigugjaldi fyri lendið omaná Fimi í 30 ár.

Óvist hvat ÍSF-húsið kostar

Tórshavnar kommuna bindur seg til at rinda fyri møguligan meirkostnað fyri partar av tekjuni av ÍSF-húsinum, so tekjan tekur seg út sambært ætlanini fyri Tórsvøll.

Tað verða faðir og dóttir, ið skulu skriva undir leiguavtaluna, sæst í innlitinum. Tí umframt, at kommunustjórin skal skriva undir, skulu Heðin Mortensen, borgarstjóri, og Elin Heðinsdóttir Joensen, ÍSF-forseti, sum eisini er dóttir Heðin Mortensen, skriva undir.

Hvussu nógv Tórshavnar kommuna skal rinda fyri at keypa gamla ÍSF-húsið sæst ikki av innlitinum í uppritinum til skjeytið fyri gamla ÍSF-húsið, tí tølini eru strikað út við svørtum.

Býráðið skal góðkenna avtaluna

Men eisini tað skjalið skulu Heðin Mortensen, borgarstjóri, og Elin Heðinsdóttir Joensen, ÍSF-forseti, og dóttir Heðin Mortensen, skriva undir.

Avtalan millum ÍSF og Tórshavnar Kommunu er treytað av undirtøku í Tórshavnar býráð.

Sambært uppritinum til avtalu, so skal ÍSF byrja at byggja nýggja sætið í 2022, og bygningurin skal verða liðugur innan 2024.