Hesir skulu verða bíligari

Kristina Háfoss, landsstýriskvinna í fíggjarmálum, hevur lagt uppskot fyri Løgtingið um, at MVG skal afturrindast, tá elbilar verða keyptir.

Tað fer at bera til at fáa í mesta lagi 70.000 krónur aftur í meirvirðisgjaldi.  Tað svarar til, at bilurin kostar 350.000 krónur.

Uppskotið tíðaravmarkað

Men tíðaravmarking er á uppskotinum. Fyri at fáa endurgoldið meirvirðisgjaldið, skal akfarið verða skrásett áðrenn 1. januar 2019.

Málið er at seta eyka ferð at umleggingina frá motorakførum, ið nýta dálkandi brennievni, til sokallað “grøn” motorakfør, ið nýta brennievni frá meira varandi orkukeldum, verður sagt í viðmerkingum til uppskotið.

El- og vetnisakfør eru í løtuni lutfalsliga kostnaðarmikil. Fyri at skunda undir eina umlegging, verður mett rætt við eini serligari afturberingarskipan í tvey ára tíðarskeið, stendur í viðmerkingum.