16 umsóknir um stuðul til lendingar

Frá 2013 til 2017 hava verið 16 umsóknir um stuðul til lendingar og annað á smáplássum, og átta av umsóknunum vórðu játtaðar.

Tað sæst í svari, sum Kári P. Højgaard, tingmaður fyri Sjálvstýri, hevur fingið frá Henriki Old, landsstýrismanni, til grein 52 fyrispurining.

Harafturat er ein serstøk játtan til havnina í Svínoy, og 2,4 milliónir krónur vórðu brúktar til at gera ein skráa til akfarsflutning við lendingina á Eiðinum í 2016. Í ár eru 900 túsund krónur játtaðar.

Landið eigur samferðsluhavnirnar á Krambatanga, á Gomlurætt, á Syðradali og ferjulegurnar í Skopun og í Klaksvík, og skal tí halda tær viðlíka.

Ábøtur í Kalsoynni

Eftir ætlan verða ábøtur gjørdar á havnina á Syðradali í ár og næsta ár fyri umleið 850 túsund krónur. Harumframt eru ætlanir um at betra um umstøðurnar hjá ferðafólki á staðnum.

Kommunurnar á útoyggj kunnu søkja um stuðul til infrakervið á útoyggj.

Kommunurnar, ið koma undir hesa skipan, eru Fugloy, Svínoy, Kalsoy, Mykines, Hestur og Koltur.

Árliga játtanin er 700 túsund krónur, sæst í svarinum frá Henriki Old til Kára P. Højgaard.