Karina vann fyrsta heiðursmerkið

Tað er nógvur vindur í Visby í Gotlandi í dag, og tað hevur ávirkað triathlon-kappingina eitt sindur.

Vanliga er kappingin soleiðis, at íðkararnir svimja 1.500 metrar, súkkla 40 kilometrar og renna 10 kilometrar. Men í dag var neyðugt at stytta svimjiteinin niður í 400 metrar vegna vind og aldur. 

Karina Ottosen var fimti íðkari upp úr sjónum, men tá súkklingin var liðug, lá hon bert ein góðan hálvan minutt aftan fyri triatletin úr Jersey á fyrsta plássi.

Hendan støðan helt sær, og tá teir 10 kilometrarnir vóru runnir, kom Jersey fyrst á mál, og síðani Karina Ottosen á øðrum plássi. Og fyrsta føroyska heiðursmerkið á hesum leikunum var veruleiki. 

Silvur í liðkappingini

Tá triathlon kappingin var av, varð eisini greitt, at Føroyar vunnu eisini silvur í liðkappingini hjá kvinnum í triathlon, tí samlaða avrikið hjá Karinu Ottosen og Onnu Lisu Møss rakk til eitt annað pláss í triathlon.