Fíggjarmálaráðið tók løgtingið av ræði

Fíggjarmálaráðið tók løgtingið av ræði og broytti av sínum eintingum fíggjarlógina fyri 2017.

Fíggjarmálaráðið kann ikki rætta fíggjarlógina, sum løgtingið hevur samtykt, og løgmaður hevur lýst sum lóg.

Skrivarin hjá Fíggjarnevndini, Høgni Joensen, ger nevndina varuga við hetta, nú nevndin viðger uppskotið um eykajáttanarlóg fyri august.

Hann sigur, at eftirkanningin hjá Løgtingsskrivstovuni vísti, at samsvar er ikki er millum fíggjarlógina, sum løgtingið samtykti, og sum løgmaður síðani lýsti, og fíggjarlógina, sum Fíggjarmálaráðið arbeiðir eftir.

20 milliónir á muni

Í fíggjarlógini, sum løgtingið samtykti, stendur, at góðar 22,6 mió. kr. skulu í Búskapargrunnin.

Í uppskotinum um eykajáttanarlóg, sum nú er í tinginum, er upprunaliga játtanin vorðin góðar 42,8 mió. kr.

Hetta er sama upphæddin, sum er í ritinum Fíggjarlóg 2017, sum Fíggjamálráðið gav út.

Fíggjarmálaráðið sigur, at fíggjarlógin er rættað, so hon er í samsvari við lógina um Búskapargrunnin.

Bara løgtingið

Men skrivarin hjá Fíggjarnevndini sigur, at Fíggjarmálaráðið kann ikki rætta ella broyta fíggjarlógina soleiðis.

Ein slík rætting krevur heimild í sjálvari fíggjarlógini. 

Ta heimildina hevði Fíggjarmálaráðið ikki. 

Bara løgtingið kann rætta fíggjarlógina, ikki Fíggjarmálaráðið.